رسالة الي صديقى المتوفى
وااا السلام عليكم ورحمة الله وبركاته
الكلام دا كتير أوي دير بالك
#رسالة_الى_صديقي_المتوفى
من سنيين وانا بفكر ف اليوم الى هكتب فيه الكلام دا ...
بعد 3 سنين ونص فى الكلية خلاص مبنلبسش الاسكرب دا تانى فبنمضي لبعض ونكتب كلام نفتكر بيه بعض بعدين ان شاء الله .. كنت مستنى اليوم دا عشان كنت أحب أووى ناس قريبة مني وناس بحبها فعلا تكتبلي وأعلق الاسكرب فأوضتى " الى أنا مش عارف أروحها دلوقتى بسبب الى بيحصل ^^ "
المهم لما جه اليوم دا لقيت ناس كتير من حبايبي مبقوش موجودين ودا من طبيعة الحال ..بس انا قدرت احضرهم معايا بردو وفى ناس للأسف مقدرتش أكتبهم
شخص واحد كنت أحبه يمضيلي بس محصلش نصيب لأننا بعاد دلوقتى
نتكلم بقا عن الحوار دا كله
أولا .. حبيبي محمد فوزى مهما أحكى مش هقدر أوصف بس هحاول ..
فوزى وأنا كلمة أخوات ولا حاجه جمب صداقتنا والله كنا لبعض نعم الأصدقاء فكل حاجه صداقة غريبة مشوفتهاش فحد والى هو دايما بنفكر بعض ولا أنا أقرب حد ليك ؟ أكيد طبعاا
كان ممكن اتخلى عن أى حد وأى حاجه عشان ميزعلش بجد وهو نفس النظام
الشخص الوحيد الى كنت بديله أسراري كلها لدرجة ليوم وفاته كان معاه كله أكونتاتي وكان بيدخلها عادي والعكس بقا فكل حاجه
أول فترة ففراقه حقيقي مكنتش لسه متأكد انه اتوفى معتقد دايما انها اشتغاله لدرجة أنا مبكتش عليه أول كام يوم فعلاا كنت مصدوم ومتعصب بس " أيون كنت مضايق ومستغرب الى بيحصل "
وقتها بردو سني كان صغير 3 ثانوى
14 يناير 2016
فى حد وقتها قالى هتعدي والحياه هتشغلك ودا حقيقي الوقت عدى وبيعدى لكن الحياه مبتشغلنيش .. فكل وقت صعب بمر فيه حتى هذه اللحظة دي مازلت بتمنى لو يبقى موجود وأروح أقعد وأتكلم معاه .. يعني مثلا أنا عامل حجر لنفسي فى البيت لوحدى مبتعاملش مع أى حد نهائي . متأكد انه الشخص الوحيده الى كنت هقعد معاه عادي . فأنا مبقدرش ألوم أى شباب بتخرج لصحابها بجد اليومين دول رغم الى بيحصل .. الصداقة شئ صعب والفراق أصعب ف احنا لازم نبعد دلوقتى عشان نقدر نقعد مع بعض بعدين
... المهم فوزى كذا مرة سألنى هتعمل ايه يوم وفاتك فأنا كنت بنفضله بحكم أنت أهبل فكك من الكلام دا لكن فى مرة بقا صمم فيها اوى انه يعرف هعمل ايه وقالى مش هنمشي غير تقولى فأنا مكنش عندي رد غير هزعل طبعا يافوزى وهزعل جامد بس
لأنى مكنتش أعرف احساسي هيبقى ازاى وفقدان شخص بالقرب دا هيبقى ازاى
والى حصل بعد وفاته انى كنت شخصيه وبقيت شخصية تانية خالص يمكن أسوأ يمكن أفضل مش عارف بس الى أعرفه انها شخصية مُش مستقره نهائي
الحاجه الغلط الى عملتها لما خليت فوزى الصديق الوحيد والباقي صحاب عادي انى اعتدت عليها فلما اختفى حصلى زي أعراض انسحابيه ودا الى لسه أنا فاهمه قريب .. بقا صعب عليا أتعلق بشخص ويمشي نفسيا فى حاجه غلط جوايا
...
مهما يحصل متخسرش صاحبك لأى سبب والله هتندم ندم ميتوصفش خلاص الشخص دا مبقاش موجود روح ياعم وصالح واعمل أحلى ذكريات مع صحابك اتصوروا كتير أوي واتصوروا فيديوهات وارفعوها علي النت عشان أنا وفوزى فى بيننا ذكريات كتير اتمسحت بسبب هارد حقير اتحرق
عيشوا عشان تعملوا ذكريات حلوة مع الناس دي هى الى هتعيشوا بعدها
والدة محمد فيوم قالتلي السنين هتعدى وهتنسوا محمد وهتقل زيارتكم ليا .. قولتلها وارد فعلا من الكل الا أنا .. لأنى واثق انى عمري مهنسى بس أنا كنت غلطان احنا محدش فينا نسى كلنا مازلنا فاكرينه وحتى الان صور محمد معانا وبنزوره دايما وفكل مناسبه حزن شديد انه مش معانا
احنا كنا صحب بجد . أنا طولت ف النقطة دي بس أصلا الأصل أنا عاوز أكتب عن محمد وكنت اتمنى يشوف الكلام دا ويعرف قد ايه هو فرق معايا وهو دا الى حصل بعدد وفاته .. ربنا يرحمك ياصاحبي أنت أجدع حد عرفته فحياتي والى عمره ماتخلى عني أبدا لأي سبب ..
محمد وانا ياما اتخانقنا وتقريبا كنا مختلفين فى الرأى بنسبة 90% ودايما نقاشاتنا كانت بتقلب بشد بس مفيش مرة واحده روحت واحنا متخاصمين ومفيش يوم مكناش بنتكلم ولا يوم واحد حرفيا .. كنا بنسهر مع بعض فبيته لحد مثلا الفجر وبعد الفجر نخرج نتمشى ودا كان الروتين لحد سبته سبعه كدا ونروح ونتفق هنتقابل تانى امتى حقيقي وحشتنى الأيام دي
قعدت بعدها سنين مبقدرش انام فى الوقت دا أبدا ولا اقعده فى البيت لازم أخرج اتمشى فى نفس الأمكان الى كنا بنتمشى فيها .. ممكن بعض الناس يفكروا دا جنان او انى مزودها بس دا الى بيحصل .. ومازلت بروح ازوره حتى الان واحكيله كل حاجه حصلت معايا اكنه موجود الفكرة بس انه مبيردش عليا بس بحلم بيه كتير جداا
.. كنت اتمنى يحضر معايا يوم زي دا وكذا يوم
كنت اتمنى يحضر خطوبة وفرح أخويا الى فعلا كنت مفتقده اوووي وخصوصا فى الفرح كنت حاسسني لوحدي جدااا فى التجهيزات وكدا بس صحابي من العريش والجامعه كانوا جمبي وقت الفرح رغم ظروف الفرح الصعبه والمطره حقيقي بحب الناس الى جت كلها وكل ميحصل موقف افتكر انى ازعل منهم وافتكر يوم الفرح مبقدرش افكر ف الزعل فعلا رجالة والله وحبايبي
...
الناس القريبة مني الفترة دي تعرف عني انى بتقمص بسرعه ودي حقيقة لأنى اتعودت دايما علي الامتلاك للقريبين مني . أهلى مكنوش قريبين مني زي فوزى كان أبسط الحاجات والغريبة اننا كنا بنتكلم ف الفون حتى وقت المذاكره ونحل مع بعض رياضه وهو ماشاء الله كان متميز جدا فى الرياضة كان بيساعدني ونحل مع بعض بالساعات .. اتعلمت من بعد وفاته والى لازم كلكم تعرفوه .. لازم تحاولوا تعملوا أى حاجه ولو بسيطة الناس تفتكركم بيها لازم تسيبوا أى أثر يبقى دا مثلا كل ميتشاف نفتكركم بيه
كفاية لحد هنا فمحمد الكلام مش هيخلص
_____________________________________
أنا كتبت كل الى الناس الى مفتقدها وكنت أتمنى يكونوا معايا
وصحابنا الى خسرناهم ( عبدالرحمن ابو الفتوح ومحمد يوسف ) ربنا يرحمهم من أطيب خلق الله والله
وكنت أتمنى يبقي دي فتره كلنا مع بعض فيها لكن ربنا ليه أسبابه واحنا راضيين طبعا
الشخص الى كنت عايزه يمضيلي ويكون موجود اليوم دا وفعلا كان صعب
.. الكلام الحلو عليك كتير بس مش هقوله بحكم خلاص احنا مبنتكلمش وكنت أحب اسمك يكون موجود وكام كلمة حلوة منك واصلا مش هيشوف الكلام دا
__________________________________________
RINA
من أكتر الناس الى وقفت جمبي وبتسمعنى الفترة الى فاتت كلها .. وسبب من الأسباب الى خلتنى اعدي فترة حب طويلة وكانت انتهت
اتعرفت عليها فلعبة اون لاين ومن يوميها واحنا صحاب جدااااا حقيقي ممتن اني أعرفها
أرجنتينيه وأجدع من مصريات كتير
ازاى تعرف الشخص الى بيحبك بجد لما تجبره يمشي وميمشيش . دا شخص بيحبك
من الناس الى كنت اتمنى بردو تحضر معايا أحداث حلوة كتير .. بس هى تعتبر حاضره كل شئ ..
شكرا جدا على وجودك .. رغم اننا بنختلف كتير بسبب اختلاف اللغة والترجمة الى هى بتقعد تترجمها .. حقيقي العربي بتاعنا صعب :D
______________________________
هنشر صور الاسكرب فى الكومنتات من كل ناحية .. أنا كتبت أسامي أكتر الناس الى بحبها قبل مزمايلي يمضولى
وعاوز أقولهم الى مكتوب هنا ليه ولو ذكرى واحده قوية وجميلة معايا وحقيقي شوفت منكم حلو كتيير ..
والناس الى فعلا متستحقش مكتبتهاش .. فانت لو مش مكتوب انا منستكش أنا أهملتك لأنى أهملتني فموقف احتجتك فيه
معلش أنا عاطفى شوية برج الحوت بقا وحنين وكدا
_____________________________________
صدقونى دي تفصيلة صغيره أوووووي من حياتي
انت لو وصلت للنقطة دي يبقى انت كائن غريب انك تقرأ كل دا اكتبلي فكومنت * النجمة دي عشان أستغرب انك قرأت <3
تعليقات
إرسال تعليق